د ارزګان د ولايتي شورا رييس وايي، چې طالبانو تر هلمند وروسته په ارزګان کې خپلو حملو ته دوام ورکړی او ياد ولايت د سقوط په حال کې دی.
د ولايتي شورا رييس عبدالکريم خادمزي ويلي، دوه ورځې کيږي چې پر مرکز ترينکوټ جګړه روانه ده او وسله وال د ترينکوټ ښار ٦٠٠ مترۍ ته رارسېدلي.
نوموړي زياتوي، ولايتي اداره په دې اړه د کورنيو چارو وزارت، دفاع وزارت او ملي امنيت شورا سره په اړيکه کې ده، هغوى د ځانګړو ځواکونو د لېږلو ژمنې کړې، خو تر اوسه عملي اقدام نه دى شوى.
نوموړی وايي، که په بېړنۍ توګه ځانګړي ځواکونه ور و نه رسېږي، د ترينکوټ ښار به سقوط وکړي.
د ارزګان ولايتي چارواکي هم د ترينکوټ په څنډو کې ناامنۍ او جګړې تاييدوي.
د ارزګان د والي وياند دوست محمد ناياب وايي، چې ترينکوټ ته ځانګړي افغان ځواکونه رسيدلي دي او هڅه کوي چې جګړه مهار او ترنيکوټ له سقوط څخه وژغوري.