د سوریې له حلب څخه د خلکو ایستل ځنډول شوي دي

نړیواله ټولنه وایي لومړی باید یاغیانو او د هغوی پلویانو ته ته د وتلو لاره ورکړل شي، خو حکومت غواړي لومړی خپل پلویان وباسي.

په سوریه کې نن یوشمېر هغه بسونه وسوځول شول چې د حلب څخه د ملکیانو د ایستلو لپاره ورغلي و.

د سوریې دولتي رسنۍ او د بشري حقونو د څار ډلې وایي چې بسونه د اډلیب ولایت هغو دوو کلیو ته په لاره و چې حکومت یې د اوربند په بدل کې د وسله والو څخه د تخلیه کیدو غوښتنه کوي.

د حلب ښار ډیره برخه د بشارالاسد د ځواکونو په لاس کې ده خو دوه کلي چې اوسیدونکې یې د حکومت پلویان دي، د یاغیانو لخوا محاصره دي.

د سوریې حکومت، نړیواله ټولنه او یاغیان پر دې نه سره جوړیږي چې د حلب څخه لومړی باید څوک ووځي.

د حلب اوسیدونکې له ښاره د وتلو هڅې کوي، خو د ملگرو ملتونو لخوا د خلکو د ایستلو بهیر د جمعې راهیسي ځنډیدلی دی. حکومت غوښتنه کړې وه چې لومړی باید یاغیان د حکومت پلوه کلیو محاصره ختمه کړي.

خو تر اوسه موافقې ته نه دي رسیدلي او یو نیم ځای ټک و ټوک روان دی.

د امنیت شورا نن په دې رایگیري کوي چې د ملگرو ملتونو مفتشینو ته باید اجازه ورکړل شي چې د حلب ښار په شمول ټولې سوریې ته پرته له قید و شرط سفر وکړي او د بشري مرستو د رسولو څارنه وکړي.

د امنیت شورا به د فرانسې لخوا پر وړاندې شوې لایحې بحث او رایگیري کوي.

په دې لایحه کې د منشي بانکي مون څخه غوښتنه شوې ده چې د حلب څخه د خلکو د وتلو د بهیر د څار لپاره په عاجله توگه خیریه کارکوونکې سوریې ته ولیږي.