ارگ ریاست جمهوری سه روز عزای عمومی اعلام کرد

ارگ ریاست جمهوری افغانستان ضمن تسلیت و غمشریکی به خانواده مارشال محمد قسیم فهیم معاون اول ریاست جمهوری، سه روز عزای عمومی اعلام کرد.

به گزارش خبرگزاری خاورمیانه، مارشال محمد قسیم فهیم معاون اول ریاست جمهوری کشور نسبت مریضی که عاید حالش گردیده بود، به سن ۵۶ سالگی روز یک شنبه (۱۸ حوت) داعی اجل را لبیک گفت.

حامد کرزی رئیس جمهوری اسلامی افغانستان وفات مارشال فهیم معاون اول ریاست جمهوری را برای ملت افغانستان تسلیت گفت و مرگ وی را ضایعه جبران ناپذیر برای افغانستان دانست.

رئیس جمهور کشور، مارشال محمد قسیم فهیم را افغان وطن دوست و مجاهد بزرگ دانست.

رئیس جمهوری اسلامی افغانستان، تسلیت و غمشریکی عمیق خویش را به خانواده مرحومی و مردم افغانستان ابرازکرده و برای متوفی جنت فردوس از درگاه خداوند ( ج) تمنا کرده است.

همچنین ارگ ریاست جمهوری به مناسبت درگذشت معاون اول ریاست از فردا (دوشنبه ۱۹ حوت) تا روز چهار شنبه ۲۱حوت برای سه روز در تمام افغانستان عزای ملی اعلام کرده و تاکیدشده که بیرق افغانستان در این مدت نیمه بر افراشته خواهد بود.